自從跑完芭堤雅同埋柬埔寨兩隻熱馬之後, 不幸患上跟腱炎, 雖然大休六個星期, 但無乜起色... 照完X-ray, 發覺係阿基里斯腱發炎, 部份地方仲生埋骨刺, 唔休唔得!
可能上天知道我要休息, 期間澳門樂善因為天雨關係取消... 曼谷馬拉松又因為泰皇離逝又取消埋, 多咗時間休息... 直至11月腳仔有攺善, 嗱嗱聲操練番, 草下哩數... 但每次跑到10K+上下, 腳仔點都有啲抗議, 唯有改一改操練方式, 每日早晚兩課, 希望可以草番多啲哩數...
但總計澳馬前四個星期, 都係唔夠200K, 哩數嚴重不足, 12K+長課更加欠奉, 要完成全馬真係有難度, 所以今年澳馬又係要將配速調低, 如果全程保持5'20"~5'35", sub4番嚟應該無問題!
拎咗今年澳馬場刊睇睇, 發現賽道又改咗: 跟往年一樣, 只係過西灣橋一次, 跟住改去路環方向兩轉, 基本上賽道相當平坦。
所以要做sub4, 應該無問題... 但天文台預測, 氣溫稍高: 21~25度, 頭半程影響唔大, 但後半程真係好難講!
今年同馬拉兄同行, 佢今年狀態好fit, 上星期中山馬做咗3:4X'XX", 有佢做pacer, sub4肯定無問題! 5:15 由酒店jog去運動場, 氣溫真係稍熱, 微微jog下都出汗...
5:25上下, 已經到達運動場, 真係超多人! 今年似乎多咗人報名, 可能舊年大會攪番好少少! 去到入口已經塞晒人, 洗手間又排晒長龍, 好墟冚... 去到全馬龍尾, 已經5:40... 睇嚟無乜時間再熱身﹑去洗水間, 嗱嗱聲試下攝上前... 左穿右插, 都可以排响十零行, 算好前下! 等多10分鐘就開跑啦!
準時6:00鳴槍起跑, 自己傷患剛癒, 又無熱身, 唔敢爆出去, 同馬拉一齊順住去, 跟住撞到快腳joew殺上嚟, 大家傾咗幾咀後, 就提速上前, 尾燈都見唔到啦! 原來我地配速真係好慢, 第1K係 5'30", 當係熱身... 跟住另一快腳亮兄又殺埋上嚟, 可能佢排得後, 俾人阻... 原來佢要留力下星期廣州馬, 今場要留力, 所以話會hea 跑... 但第2K配速竟然係5'0X", 比預期快咗! 可能熱咗身, 腳仔無抗議, 又即管試下盡跟!
第3K之後, 開始上南灣大橋, 係咁多年嚟澳馬第一次跑呢條橋, 初初以為好難走, 但見大家無乜減速, 係咁扯上去... 可能依家大家仲有氣有力, 唔覺攰... 但咁快扯到盡, 半程之後會現形, 所以無再跟亮兄佢兩個扯住上, 都係走自己, 不過好快就落番橋, 其實都係三﹑四百米斜路, 好短... 到落橋大家反而响度回氣, 仲慢咗! 自己順住落, 反而收復失地, 追番亮兄佢地!
三個人又一齊拍住去科學館方向... 走走下, 我地實在太慢啦, 亮兄忍唔到腳, 走番自己, 馬拉唔醒水, 跟得就跟, 配速去到4'5X", 自己緊係跳車, 走番自己, 大家相距接近50米... 去到旅遊塔, 馬拉發覺我跟唔到, 又慢番落嚟等埋我, 亮兄就一支箭標咗去, 快到唔見尾燈... 剩番我同馬拉兩個拍住走!
未到第9K, 已經見到joew 番轉頭, 起碼快我地K幾兩K, 真係唔同級數! 去到10K位, 用時50'XX", 真係超出預期, 快得好緊要, 真係好擔心後勁不繼... 好快去到媽閣廟, 賽道轉入瓦仔路, 好難走, 快唔到, 可能對跑鞋太單薄... 差唔多15K, 開始上番西灣橋, 可能只係走一轉西灣橋, 大家又係唔留力, 全力上橋, 真係俾唔少人界咗! 上橋前, 已經同馬拉講咗, 有力嘅話, 順住上, 我會落斜時候追番... 馬拉果然係斜路王, 一直界上去, 界咗唔少人... 到落橋位, 自己又可以順住落, 又界番唔少人... 連馬拉都界埋... 佢差唔多要2﹑3K 先至追貼番... 但好傷元氣... 跑跑下, 聽到後面有警笛聲, 原來係非洲頭車跑手殺到, 我地走緊第一圈, 佢地已經係第二圈啦, 佢地根本响度短跑, 快到無影, 第一﹑二名有鐵馬開路, 無乜問題, 但第三﹑四名以後跑手情況惡劣少少, 佢地無鐵馬開路, 要左穿右插, 咁跑法會好辛苦, 又影响節奏... 相信大會係無諗過會出現呢個問題! 以為影響唔大! 出年大會應該諗諗點改善!
去到半馬位, 用時1:47'XX" 比舊年快咗1分鐘, 若果後半程唔做步兵, 時間應該會比舊年好! 呢個時候我同馬拉要講分手啦... 可能之前佢要追貼番我, 傷咗元氣, 開始跌watt...
因為無咗馬拉拍住一齊跑, 自己配速開始跌落5'1X", 但仍然比預期配速快... 因為暫時節奏仲keep得到, 腳仔仲有力, 所以都無諗過要食gel, 一於順住去, 有幾多去幾多!
去到23K轉折位, 番轉頭見番馬拉, 大家相距唔遠, 至多都係1﹑2分鐘! 去到25K位, 跑手開始疏落, 亦有跑手做步兵, 畢竟天氣開始熱, 跑得越嚟越辛苦... 自己都要拎海棉濕下頭降下溫!
去到27K位, 啱啱經過galaxy 百老匯, 狀態仲keep到, 本來諗住唔掂嘅話, 响28K會轉入運動場同半馬跑手一齊收工! 依家仲有態, 一於食晒42K! 28K轉折位之後, 開始進入運動場方向, 見到一架十字車泊响度, 應該有跑友需要送院急救, 大家都响左右兩邊前進, 讓番條馬路出嚟俾十字車過! 到29K, 經過運動場, 有好多人打氣, 非常振奮, 剩番十幾K, 要完成應該唔難!
差唔多30K位, 大家開始跌速, 自己都跌, 但跌得無咁快, 暫時仲可以keep住5'2X", 算唔錯啦! 到31K轉折位, 又再見番馬拉, 大家距離多咗少少, 不過都係2﹑3分鐘! 齊齊sub4應該無問題!
去到35K位, 配速跌落5'3X", 剩番7K, 食唔食gel 好呢? 若果依家食gel, 會影响節奏, 而且要發揮效力, 都要時間... 所以選擇唔食, 繼續頂埋佢!
但38K轉折位後, 配速跌落6'XX", 真係無命! 剩番4K都頂唔到5'3X", 真失敗! 前面點快都無用, 依家先嚟爆偈! 好唔容易先至經過galaxy百老匯41K位, 剩番1K多少少就可以收工, 但對腳真係提唔起, 同快行無分別! 轉入運動場前, 响對面馬路又見番馬拉, 真犀利, 大家距離無拉遠度, 仲近番少少添!
入到運動場, 望番大鐘, ~3:50'XX", 仲有大把時間, 我同馬拉sub4應該無乜問題! 最後呢200米仲可以加速添... 結果用時 3:51'19", 比舊年快咗足足3分鐘! 非常感恩! 比預期快咗, 因為哩數唔夠﹑長課又無, 腳仔尚算聽話, 可以sub4完成全馬, 真係靠老本!
再睇番大會獲獎成績, 唔知點解普遍都係慢咗? 如果自己仲有態, 真係可以跑進10名內! 但對其他跑手嚟講, 成績都好好, PB 之聲不絕於耳! 同天氣﹑賽道不無關係!