呢個賽季第3隻馬終於嚟喇, 操咗成年, 都係為咗呢個比賽! 但今年有啲唔同, 因為報咗5日後嘅超馬賽, 所以今次要留力!
既然自己要留力, 又唔打算造時間, 不如乾脆領跑帶人造時間! 也試一試做人地嘅電兔, 自己目標時間只係 sub330, 若果係女跑手能夠跑出呢個時間, 即刻升呢做精英跑手, 可以領取一千大元! 所以做活活電兔就落响我地8個大漢身上: 奧斯卡﹑大B﹑馬拉﹑eric﹑chris﹑TKOer, 火仔同埋自己... 主要係eric負責配速, 因為佢控速最穩定, 唔會時快時慢!
5:40大家一早去到尖沙咀, 跟住去集合地點熱身﹑上廁所﹑影相﹑ 貯物﹑上線! 可能晏咗少少, 唔少跑手已經上晒線... 我地只可以慢慢左攝右攝, 但都只係中間位置! 唔係好理想!
~0610準時開跑, 但人太多, 都只可以慢慢行, 對我地影响好大, 所以eric又要左穿右插, 儘量扒番上前, 爭取損失時間... 所以配速上到4'3X", 對我地5個大漢問題唔大, 但對活活嚟講, 動咗真氣! 又亂咗節奏, 跟得好吃力! 可能eric無為意, 其他3隻電兔仲繼續提速, 真係死得! 未到5K, 已經唔見chris! 再走多1K, 活活落後得好緊要! 話明做pacer, 做乜全部走晒去? 所以自己放慢等埋活活上嚟, 然後再慢慢調整! 雖然損失半分鐘, 但活活都可以調整到, 攞番節奏, 雖然係上昂船州斜路, 但一啲唔慢, 界咗唔少人!
去到10K位, ~49'5X", 落後5X"秒, 仲可以追... 不過一輪衝鋒, 活活狀態真係麻麻, 做唔番平時練習果種效果! 仲沿途不斷拎水, 雖然提咗濕下口, 但估佢都應該飲唔少... 結果成肚都係水, 越走越辛苦! 戰意開始走下坡, 仲叫我走添!! 如果呢個時候走, 肯定乜都散! 死都要留低一齊拍住跑! 至多再走慢少少...
未到青馬大橋轉折位, 陸續見到回程跑手, 其實同eric, 馬拉... 佢地唔係差好遠 ~800米! 青馬大橋回程之後, 活活戰意似乎返番嚟, 又可以走4'5X"!! 差唔多落橋位, 居然見到昌兄上緊橋, 真犀利, 遲半個鐘起跑, 依家大家只係相差唔夠4K!
未到汀九大橋轉折位, 同前車又拉遠少少, 接近 ~1K, 去到20K位, ~1:40'XX", 落後1分鐘多! 都仲可以追, 嗱嗱聲叫佢食定gel, 一於借助外來勢力, 睇下有無幫補? 點知佢果頭食完, 呢頭又叫我走, 包gel 似乎無乜效力, 幫佢唔到! 可能條橋又大風, 又凍, 真係打沉跑手意志! 好彩天鬼及時出現, 仲著住奇裝異服, 佢仲話好熱, 嗱嗱聲叫同我地開路, 順便擋下風... 似乎有啲用, 可以順住走到去長青隧道!
但去到長青條長斜, 又係考驗, 幾經辛苦, 先至過得到, 不過, 損失唔少時間, 又係果句: 走喇! 咁啱呢個時候見到阿仁, 响度行緊, 順口鼓勵下佢慢慢jog, 居然又跑番起, 仲拍住一齊跑, 兩個人响活活前面擋下風, 真係幫到唔少! 走下走下又可以5'0X"
去到30K位同目標時間落後咗3分鐘! 大家知道要 sub330相當渺茫, 所以她催促小弟趕快離開, 要趕上sub330! 我話走多兩K睇下點先?
32K望一望腕錶: 2:40'XX"要跑10.195K, 真是mission impossible!! 而且仲係最艱難嘅路段! 姑且提速盡力一試! 可能頭段太慢, 依家仍然有力, 居然可以維持 4'2X"~4'3X"配速! 似乎有一絲希望, 但去到西隧出口﹑龍和道﹑馬師道天橋, 真是死得, 唔駛行已經偷笑! 但呢十幾K 沿途真係睇到不少人要行﹑ 有啲仲抽筋! 呢條賽道真係一啲都唔簡單! 打殘好多人!
最後差唔多轉入糖街, 望一望腕錶, 只是3:28'XX"! 剩下2﹑300米, 要 sub330 應該無問題, 頓時鬆懈落嚟, 按著節奏跑番去, 睇下daisy, 馬拉嫂响邊度影相...
踏進維園時, 又周圍望下強兄﹑pennie﹑高妹响邊度... 但抬頭一望大會時間, 竟然係3:29:4X"?? 諗都唔諗, 即刻chok 晒手衝去終點... 結果自己時間3:29:3X", 但大會時鐘係 3:00'0X"!! 未能 sub330!! 有少少後悔!! 真係時也﹑ 命也! 天意弄人!! 無得出年優先報名! 跟住見番大家, eric同火仔順利 sub330, TKOer ~3:24'XX"完成;
馬拉响西隧前開始作抽, 結果同活活拍住番嚟, ~3:40'XX", 算有交代! desmond同昌兄最快, ~3:1X'XX"番嚟, 雖然唔算快, 但點都要留力超馬!
vincent過咗4個鐘都未見人, 後來聽到明兄話跌親, 入咗急救站, 原來佢响25﹑6K踩中貓眼石, 即刻失平衡, 做咗趴地熊, 暈咗一陣, 雙手雙腳損晒, 條2XU穿埋... 打算上車, 搵極唔見巴士, 邊行邊痛邊走... 竟然返到終點都上唔到車, 即刻埋站急救! 好彩只係皮外傷, 無大碍! 好彩!
雖然大會時間多咗8秒, 但原來優先報名係以個人時間為標準, 真係好彩, 失而復得!!