今年賽季第二隻馬, 兩個星期前啱啱跑完澳馬, 已恢復得八八九九, 但都係長課欠奉, 所以又係無乜期望, 不過呢個賽事除咗上梅子林一段之外, 比澳馬平坦, 要跑番345~350應該唔難!
一早約齊跑友齊齊搭的士入馬鞍山, 唔駛20分鐘已經入到去, 大把時間熱身... 可能時間尚早, 跑手唔多! 拉完筋﹑熱埋身﹑去埋廁所, 都仲有大把時間, 可以排得比較前!
天文台話早上氣溫17~18, 相當唔錯, 但日出之後, 會升到22~23度... 呢個賽事賽道比較空曠, 好少遮蔭, 真係隨時會曬死﹑熱死!
今朝見唔到高手响度, 可能大家去咗美津濃半馬﹑石崗30K﹑深圳馬拉松...都未定!
差唔多0630, 大會鳴炮一響之後, 大家一齊起步, 可能企得較前關係, 跑得好鬆容... 但配速實在太慢, 俾唔少精英跑男女跑手界到一頸血... 因為自己唔中意跑磚路, 跑得頗痛苦... 而且大會無封路, 賽道有唔少晨運客, 仲要係公公同婆婆, 要打醒13分精神, 撞跌一個就大件事!
2K之後, 係第一個轉折點, 亦都慢慢開始出日頭... 4K半上下又再經過起點, 見到唔少半馬跑手响度熱身! 6K上下開始進入梅子林, 頭1K坡度唔大, 無乜難度, 但跟住果半K, 就辛苦少少, 大家走得好吃力! 但好快到達第2個轉折點, 落斜之後基本上以後都係平路, 以為好好走... 但唔知點解城門河旁好多彎位, 一時行人路, 一時單車路... 路面亦都凹凸不平, 唔係咁好走!
16K上下, 已經覺得腳仔唔係好聽駛, 唔上力, 又提唔起! 但無理由咁快爆偈? 而且配速又唔係快... 跟住有熟悉嘅師姐界上嚟, 發覺大家配速差唔多, 可以拍住一齊跑... 居然又可以保持番配速... 仲可以keep住呢個配速走咗10K... 去到馬料水21K位, 用時1:50'XX", 慢咗少少... 差唔多26K位, 轉入元仔洲, 自己真係爆爆地, 貼唔到師姐啦, 唯有食包gel 頂埋佢. 但配速真係跌得好緊要, 俾人係咁界!
終於去到29K第3個轉折點, 亦係心理關口開始... 睇番配速, 已經跌落5'3X, 3:4X番嚟已經無望, 唯有寄望唔好跌咁多... 但望下前後左右, 大家都係跌到阿媽都唔認得.... 而且天氣又曬又熱, 大家真係跑到好辛苦!
32K上下, 出番吐露港公路, 基本上大家都响度捱緊, 亦有唔少人做步兵... 自己堅持點都要跑晒佢, 唔俾行! 但去到白石角, 自己開始散散地, 配速進一步跌落6'XX", 真係估唔到最後果6﹑7K都頂唔到... 有可能仲慢過澳馬時間!
真係好辛苦先至到咗孖橋, 剩番3K, 自己都仲可以keep住6'0X"配速, 但周圍其他跑手仲辛苦, 邊行邊走 ~6'3X"配速... 唔知點解, 呢條海濱長廊, 走極走唔完, 好似長咗好多...
最後1K, 大家似乎開始回魂, 配速亦快咗... 入到運動場, 真係人山人海, 連跑道都係人... 原來係排隊拎水﹑生果... 可能咁啱半馬﹑全馬跑手同時衝線, 疏散唔切! 自己衝線之後(用時3:52'XX", 比澳馬慢咗2分鐘, 真失敗) 跟住嗱嗱聲走去排隊拎野, 大大話話排咗半粒鐘, 又熱﹑又曬﹑又口渴... 唔知點解大會效率咁慢, 好有問題... 點解唔可以衝線之後即刻派水先? 至少俾大家可以降下溫先! 其他野可以慢慢拎!
再拎埋行李, 諗住沖番個涼, 又係唔知乜野事? 水壓又低﹑又無熱水, 唔通場地關咗水掣, 唔俾大家沖身? 又聽講精英跑手响回程又係同半馬跑手撞正, 影响配速!
大會本來都好有心, 想攪好呢個賽事, 好多細節都有照顧, 例如會SMS大家有關賽事消息, 又會SMS通知獲獎跑手...話晒係本港第三個全馬賽事, 而且又攪咗三﹑四年, 應該好有吸引力, 無理由响賽道分流﹑派水會攪成咁!